Regisseur Harm Dijkstra kan wal wat zeggen: “De monniken moet met een biertunnegie opkommen dat zie hen de burcht brengt um an heer Harmannus te geven”….
Gerrit Hegen: “Biertunnen bint der in soorten en maoten. Veur ij het weet geef ij toe an de verleiding um een mooi wienvat van 100 liter mar as biervat te gebroeken. Mar hoe moet die arme monniken dat vervoeren zunder steekkar of wat an ok. Niet getreurd: wij hebt Marktplaats.
Oet de Rozengracht Amsterdam
Daor vund ik het prachtige biertunnegie van 30 liter van de Amstel Brouwerij da’j op de foto ziet. Het was te koop veur 15 euro bij Sjaan in Almere Haven. Weer een van de mooie menschen diej in de aanloop van de Toorn van Thunaer ontmoet. Sjaan had het tunnegie in 1970 met heur vriend, waormet zie later trouwd is, oet de Rozengracht in Amsterdam vist. Een prachtig exemplaar.
In 1973 is het stel verhoesd naor Almere Haven. Het biertunnegie gung met en stund sindsdien op een mooi plekkien in de kamer.
Al die tied gevuld met water. Net zo geef! Het weur wat te vol in de kamer en dat was de reden dat het tunnegie te koop zet weur.
Non mus ik op 7 augustus in Noord Holland wezen en op de terugweg bin ik over Almere Haven gaon um het biertunnegie op te halen. Op de foto ziej de steekkar met tunnegie op de stoep veur het hoes van Sjaan. Toch mar even het water der oet laoten lopen, tiedens het heuren van het mooie verhaal van Sjaan.
Tunnegie in Slien
In Slien heb ik het naor Piet Doek van de decorcommissie bracht. Die hef een draagbaar maakt met twie haken waoran het tunnegie hangt. Het is het zölfde systeem as waor de biertunnegies an de olderwetse bierwagens hangt. Dus non kunt de monniken het tunnegie dragen en de roofridders, die het later steelt, het rollen….
