‘De geboorte van het stuk begunt nou zo’n beetie’

“Dames en heren, eindelijk trapt wij De Toorn van Thunaer of. Der is al veul wark verzet, maor het mieste mut nog kommen.” Harm Dijkstra hef zoas altied al rap de lachers op de haand tiedens de allereerste tenielrippetitie veur het muziekspektakel De Toorn van Thunaer in MFC De Brink in Slien.

Het is de eerste zaoterdag van 2019, het jaor van de waorheid. “De bevruchting hef west, de geboorte van het stuk begunt nou zo’n beetie”, voegt Harm der nog gauw an toe. De toon tiedens de eerste rippetitie is zet. De sfeer is goed. Iederien hef der zin in. Over negen maond is ’t zo ver.

Tekst veurlezen

In een grote kring wacht elk van de ungeveer virtig speulers zien of heur beurt of. Um beurten leest wij oeze tekst veur. Ik vind het best spannend, want ik moet as eerste wat zeggen. Gelukkig oefent wij eerst ‘dreug’. In mien geval letterlijk, want mien tegenspeulsters en ik zit in het stuk oeteindelijk in een bootie.

Iederien komp an de beurt vanmiddag. Op sommige personages wordt al wat dieper ingaon. Harm gef geregeld anwiezings en nemp ok de stemmen veur zien reken van enkele rollen waor as nog mèensen veur anwezen moet worden. Zo leest wij in 2,5 uur tied het hiele script deur.

Personages komt tot leven

Nao de audities van veurig jaor mei bint wij as speulers nou echt begund! Her en der komt personages al lezend al een beetie tot leven: de statige kasteelheer, zien knecht, de troubadour oet Duutsland, de grote schurk, de heldhaftige boeren…

Veul rippeteren

Harm vertelt oes da’w niet te bescheiden wezen moet. Wij moet der straks echt staon op de grote speulterrein op landgoed De Klencke. Het zal veul ankommen op timing. “Aj van het tolhuus hen de Boksloot lopen moet, is dat misschien wal honderd meter. Dan moej precies weten wanneer ie moet gaon lopen um op tied op je plek te wezen”, zeg Harm. “Het is niet zoas op het teniel bij Wielens in Noord-Slien daj drie seconden veur je op moet de deur naor het podium lösdoen kunt.”

Dudelijk en met grote gebaren spreken is ok hiel belangriek, legt e oet. “En plankenkoorts is verspilling van energie. Wij hoopt dat met het rippeteren de plankenkoorts die sommige mèensen hebt, plaotsmaakt veur positieve energie. Daj der veural zin in hebt!” “Drank mag nog steeds niet?”, vrag Jolanda gauw tussendeur. Nee, drank nemp de zenuwen echt niet weg, mient Harm. Volgens hum is het ok een fabeltie da’j met een slok op beter gaot zingen. Alle speulers bint straks vanzölf ok zangers, de miesten doet metan in het koor, maor een diel zingt ok in een ensemble of zölfs solo.

Hij hef nog ien bosschup:

 “Geniet ok veural van het project! Het giet hiel snel. As het straks weer neijaor is, zit het der alweer drei maond op. Veur je het weet, is ’t veurbei.”

Verslag: Annemiek Meijer

Categorieën Nieuws