En nou… is het volbracht!

Back to life, back to reality… Dat liedtie van Soul II Soul stiet op ‘repeat’ in mien heufd. Veur het eerst sinds een paor weken gien Bonnen en Bier, Verraoder of Hier is nou en daor is toen. Gien bootie vaoren, wat nao ien keer oefenen toch ontzettend goed bevuul! En niet aovend an aovend een ‘joint’ roken en zogenaomd in hoger sferen verkeren.

Maor De Toorn van Thunaer was ien geweldige ‘trip’, van het begun – veur mij met een informatiebij-ienkomst en audities veurig veurigjaor – tot zundag. Een trip, ok in de zin van een reis, die ik niet har willen missen. Gienien van alle dielnimmers, denk ik! De leste elf dagen vörmden natuurlijk het hoogtepunt met eerst vief aovends achter mekaar de punties op de i rippeteren en daornao dan echt ‘het uur U’, zoas Gerrit het eerder nuumde. Zes aovenden lang duurde dat uur U en ik bin niet van de zenuwen underoet gaon en heb ok gien paniekaanval kregen. Logisch denk ie lichtkaans, maor zo logisch hef dat niet altied west.

Wat een riekdom um dit te kunnen doen en um zoveul aordige mèensen te leren kennen waormet ie dan opiens zoveul dielt en waormet ie de scholders der under zet, under de bezielende leiding van Harm, Jan en Gerrit. Elke aovend speulen en zingen veur zeker achthonderd man (780 op de tribune en toch ok wal zo’n 30 a 40 vrijwilligers dernaost), dat gef een kick. En dan al die reacties achterof… Niks dan lof!

Het was zo intensief dat ik haost nargens aans an denken kun of over praoten kun. Dat geldt ok vast veur haost alle dielnimmers en vrijwilligers! Wat heb wij een lol had en veul beleefd. Maonden leef ie der naortoe en dan opiens is het zundagaovend kwart veur elf en klinkt het allerleste slotapplaus.

De weemoed kwam veural toen ik gisteraovend (maondag) over De Klencke reed, de zun under gung en ik dacht: tja, nou stapt wij niet meer in het boottien. De mooie brug is vot en Harm belt ok niet meer um 19.38 uur dat wij van wal steken kunt.

Maor… gelukkig hebt wij de foto’s nog. HIEL VEUL foto’s. Daorvan is zundagmiddag een selectie te zien tiendens de afslutende middag en der komt een glossy, waor Géke en ik oes met ‘glossy-girl’ Roelie Lubbers over boegen gaot. En dan hew ok in november nog een aovend, zodat wij nog niet helemaol van mekaor af bint (gelukkig).

Met veul plezier heb ik ok metwarkt an dizze website en andere pr-activiteiten. En in mien heuft galmt Gienus Woldrings slotwoord nog nao: ‘Dit smaakt naor veul meer!’

Tekst: Annemiek Meijer
Fotoimpressie van Ton Trompert

Bekijk ook de fotoserie van Rob Faas van de laatste repetitie en de generale.

Categorieën Nieuws