Non op het terrein de sporen van oes geweldige project zo’n beetien oetwist bint rest herinneringen, mooie foto’s en filmpies an een onvergetelijke tied met prachtige menschen. Der bint neie vrundschappen ontstaon en wij moet oes met mekaar bewust wezen van het ongeleufelijke talent in oeze regio.
Veurtraject
De keuze um menschen oet Hesseln, Slien, Zweel en wiede umtrek op te roepen um met te doen an de Toorn van Thunaer is een golden greep west. Oeteindelijk hebt der nao de zangaudities 110 zangers en tenielspeulers met daon, inclusief de kinder van OBS de Woert in Hesseln. Menschen die lid bint van een culturele verieniging mar ok menschen die het mooi leek um met te doen zunder binding met zo’n verieniging. Menschen die zingen kunt, maar niet veul hadden met teniel bleken prachtige tenielspeulers of juust andersum: tenielspeulers die dachten dat zie niet zingen kunden, mar in sololiederen oeteindelijk de sterren van de hemel zungen….
Samen met de in totaal 15 ruiters, menners, schaopherders en geitenholders en roem 50 muzikanten is der een prestatie van formaat leverd!
Intentieve rippetitietied
Het was een intensieve Toorn van Thunaer periode. In januari startten de teniel- en zangrippetities en in de ofgelopen 8 maonden volgden der enkele tientallen. MFC de Brink in Slien en de Hesselerhof waren daor het decor van. Bij beide bint wij biezunder gastvrij onthaald. Der was in goed overleg van alles meugelijk. Hartelijk dank daorveur.
Hulde an alle speulers en muzikanten dat zie zo intensief rippetteert hebt en gedurende het proces aal enthousiaster en gemotiveerder wuren. De zangrippetities met dirigent Jan Kruimink bint deur veulen as een feestie ervaren, de gedrevenheid van dirigent Jan Kruimink sluug over op het koor, de ensembles en de solisten. De bereidheid um het goed te doen bleek ok oet het veulvuldig gebroek maken van de understeunende zanglessen van zangpedagoge Janet Emmelkamp.
Bij de tenielrippetities een iender beeld. Der is veul lacht mar der is ok deur schriever en regisseur Harm Dijkstra het underste oet de kan haald um de kwaliteiten van iedere speuler te benutten en de rol de vörm te geven die hie bedoeld had. De adviezen van Hanneke Braam en Sjoerd Wagenaar gedurende de verschillende stadia van de rippetities waren daorbij van onschatbare weerde.
De oetvoerings
De oeteindelijke oetvoerings hebt oeze stoutste dreumen overtröffen.
Het boeiende verhaal met de mooie liedties, oetbeeld en oetvoerd deur speulers in treffende middeleeuwse kleding (dank an de snieders!) , begeleid deur de fanfare van Excelsior met dirigent Pieter Bosma, pianist Tjako van Schie en violist Hilde Kruimink. De wonderschone locatie an Boksloot en Mosterddiek in een bosrieke umgeving die was inricht met angepaste decorstukken (dank an de decormakers!). De mooie luchten met een schitterende maon en de prachtige belichting. Dit alles vuul bij het publiek, jong en aold, in de smaak en leidde tot euforische reacties bij het verlaoten van de tribune, op het horecaplein, op diverse social media, in de pers en op radio en TV.
Het vuul oeteindelijk allemaol op de plek. De technici Harry Dorgelo en Bart Kruimink van Dorgelo Audio Service speulden daorin een belangrieke rol. Harry Dorgelo mus 55 headsets inprogrammeren in de verschillende (underdielen van) scènes. Veur het vinden van de balans tussen solisten, ensembles, koor orkest, pianist en violist was tied neudig. Tied die der bij volgens enkele ongedurige metwarkenden niet was. Mar Harry bleef stoïcijns, rustig. En met het geluud is het goed kommen, meer dan dat: het was fantastisch! Bart Kruimink luut al doende het lichtplan gruien naor het prachtige resultaat dat het publiek zien hef. Dat de inzet van rook niet aaltied te reguleren is hew ok zien…
Horecaplein, vrijwilligers
Alles dreit um het muziektheaterspektakel. Aj zowat op de planken brengt möt de organisatie der rond um hèn ok kloppen. Een goeie PR met website en pagina’s op social media bint anno 2019 niet meer weg te denken. Op de dagen van de veurstellings anrieroutes veur auto’s en fietsen, parkeren, looproute, kaortcontrole, munt- en programmaboekiesverkoop, opvang van het publiek bij op- en ofgaon van de tribune of op het horecaplein, bediening op het horecaplein, toiletveurziening, EHBO en nog veul meer. De commissies, die dat regeld hebt met een grote groep gemotiveerde vrijwilligers, fotografen, verkeersregelaars, EHBO-ers en ingehuurde dienstverleners, verdient een grote pluum. Ok hier hiel positieve reacties van oes publiek.
Körtum
Wij kiekt achterum op mooie oetvoeringsdagen. Het bestuur van de Stichting Ter Klinke en de drie initiatiefnimmers bint trots op wat der presteerd is. Fijn daj allemaol de dieverdaotsie die wij je wollen bieden waardeerd hebt! En wij, wij kiekt al weer veuroet….
Met hartelijke groet,
Gerrit Hegen
Productieleider Toorn van Thunaer, voorzitter stichting Ter Klinke.
