Excelsior licht tippie van de sluier op

“Wij bint hiel neischierig naor hoe het klinkt. Wij hebt allent oefend met piano, dus dit is hiel aans.” Harm Dijkstra sprek vrijdagaovond de leden van fanfareorkest Excelsior toe. Hie is samen de andere bedenker van De Toorn van Thunaer, Jan Kruimink, en veurzitter Gerrit Hegen op bezeuk tiedens een rippetitie van het orkest in De Hesselerhof in Hesseln.

Toen en nou, nou en toen

Excelsior speult vanoavond speciaal veur heur het openingslied Toen en nou, nou en toen, um ze een idee te geven hoe dat klinkt. “We missen een paar bassen en hebben het twee keer doorgespeeld, dus dat moet helemaal goed komen”, grapt dirigent Pieter Bosma. Hie is sinds november dirigent van het fanfareorkest en valt geliek met zien neus in de botter: Excelsior bestiet honderd jaor, dus het orkest hef het hiele jaor een drok programma. Ien van de underdielen daorvan is het metdoen an De Toorn van Thunaer. De Grunneger dirigent is arg enthousiast.

Streekproduct

Volgens Harm is het muziektheaterspektakel dat in de eerste week van september opvoerd wordt op landgoed De Klencke ‘echt een streekproduct’. Der doet allemaol mèensen met oet de regio immers, het giet over de geschiedenis van De Klencke, Hesseln, Slien en Zweel én het hiele stuk is in het Drèents. Harm: “Het is dan ok mooi dat der ok een orkest oet de streek metan döt en niet iene argens oet het westen.”

Metzingen

En vanzölf stelt Excelsior niet teleur. De volle klanken van de blaozers bezörgt undergetiekende kippenvel op de aarms. De dames – Harms vrouw Mia, die een belangrieke rol hef in het stuk, is der ok – mugt ok wal metzingen van de dirigent. Dan blek zo’n notitieblok um aantiekeningen te maken veur dit stukke best handig um je achter te verschoelen… Maor op oes plekkie achterin de zaal zingt wij samen wal zachies met. En aj al een paor maond an het rippeteren bint en dan heurt hoe het gezamenlijk klinkt, is dat toch wal hiel erg mooi.

Ok Jan, Harm en Gerrit bint enthousiast. Dat beleuft nog wat!

Tekst: Annemiek Meijer
Foto’s: Ton Trompert

Categorieën Nieuws