‘Het verhaal goed neerzetten op zo’n groot terrein is de grootste oetdaging’

110 geluudskanalen en 55 headsets bint der neudig om het geluud van theaterspektakel De Toorn van Thunaer goed heurbaar te maken veur het publiek. Bart Kruimink (34) oet Hesseln wet alles over wat der bij komp kieken um een grote theaterproductie goed te laoten heuren en der oetzien. Zölf döt e de lochttechniek tiedens de veurstelling.

Muziek hef e thuus van zien olders Jan Kruimink en Ina Kunstman met de paplepel ingeuten kregen. Bart speult van kinds af an bij Excelsior en is sinds veurig veurjaor ok veurzitter van de 100-jaorige muziekvereniging oet Hesseln. Hie is op het conservatorium ofstudeerd op het instrument trompet, maor warkt in het dagelijks leven as persoonlijk begeleider bij Cosis, een organisatie die zich bezigholdt met verstandelijk en psychisch beparkte mèensen.

Daornaost hef e nog een warkgever: Dorgelo Audio Service. Dat bedrief döt het locht, het geluud en verzörgt ok de stroomveurziening tiendens de veurstellingen in september. “Ik bin met Dorgelo in anraking kommen deurdat wij bij Excelsior iene neudig hadden veur het geluud”, legt Bart oet. “Niet veul later kwam ik de baos weer tegen en zee e dat e het zo drok had. Ik had op dat moment gien wark en zat bij hoes. ‘Ik wil wal met je met’, heb ik zegd.”

‘Een puzzel’

Inmiddels warkt e vief jaor bij Dorgelo en hef e al hiel wat ervaring opdaon bij veurstellingen, zowel binnen as boeten. Hie is al drok bezig met het lochtplan veur De Toorn van Thunaer. “Ik bin ok al bij de decorcommissie west um te overleggen. Het is beter dat ik snel weet wat veur decor der komp dan dat ze al allemaol dingen maakt, die ik veur de belochting niet gebroeken kan.”
Op het gebied van lochteffecten is hiel veul meugelijk. “De lochttechniek in combinatie met het decor dat is echt een puzzel, maar het mooie is: wij warkt hiel goed samen. Der is veul contact underling.”

Excelsior

Deurdat e het locht döt, kan e niet metspeulen met ‘zien’ Excelsior. Beide dingen tegeliek doen, giet nou ienmaol niet. Hij is wal bliede dat de organisatie veur Excelsior keuzen hef as begeleidend orkest. “Het eerste plan was um een projectorkest samen te stellen. Ik heb dat ofraden. Veur zoiets groots kuj beter een orkest inzetten waorvan de leden goed op mekaar inspeuld bent.” Gelukkig waren ok de leden van Excelsior enthousiast um in heur jubileumjaor met De Toorn van Thunaer metan te doen.

‘Groots en gewaagd’

Bart zöt het project as een grote oetdaging. Ij markt het an de gedrevenheid waormet e derover prat. “Ik vind het een hiel groots en gewaogd project. Zie durft wal en dat bedoel ik in positieve zin. Ok vind ik het mooi dat iedereen met an doen kan, dat der niet met ien teniel- of zangvereniging warkt wordt. Iederien die met an doen wil, kreg die kaans.”

“De grootste oetdaging van De Toorn van Thunaer? Het verhaal op zo’n groot terrein goed en dudelijk neerzetten”, zeg e tot slot. Gelukkig kriegt de speulers, zangers en muzikanten daorbij ok hulp van een hiele bult techniek.

Tekst: Annemiek Meijer

Categorieën Nieuws