‘Ik mag een beetie mien gang gaon op de piano’

Tiedens de zangrepetities speult e op de piano het hoogste lied, maor undertussen valt e zölf nooit hiel arg op. Toch is Tjako van Schie de man waoras het koor van De Toorn van Thunaer volledig op steunt tiedens de rippetities en die het spektakel samen met fanfareorkest Excelsior giet begeleiden van 4 tot en met 8 september. Tied um naoder kennis te maken.

Tjako van Schie (58), geboren in Coevern, zit al zien hiele warkzame leven achter de piano. Sinds e in 1985 ofstudeerde an het conservatorium in Zwolle is e docerend en oetvoerend pianist. Hij gef les, zowel an hoes in zien multifunctionele centrum RondoM in Wilhelminaoord as op het conservatorium in Amsterdam. Ok is e gastdocent in de Portugese stad Porto.

Daornaost hef e een aantal cd’s maakt met under meer muziek van Bach, Jiddische muziek en Hollywood songs. Ok begeleidt e koren en solisten. Zo hef e under anderen zangeres en GTST-actrice Jette van der Meij begeleid tiedens heur theatertournee. “Die ofwisseling in mien wark vind ik hiel leuk”, zeg e.

Kleine wereld

Tjako is niet toevallig betrökken raakt bij De Toorn van Thunaer. “Ik ken Jan Kruimink al sinds het conservatorium in Zwolle. Zien vrouw Ina ken ik zölfs al van pianoles vrogger in Coevern. Harm Dijkstra ken ik van Pur Sang in Slien, waor ik ok met samenwerkt heb. Umdat het muzikale wereldtie niet zo groot is, kruust oeze wegen zuch zo of en toe.” Zo kun het bijna niet oetblieven dat Tjako vraogt weur veur het muziektheaterspektakel op De Klencke.

En hie beleeft der veul lol an. “Je ziet het veul meer tegenwoordig, zulke projecten. Het enthousiasme der umhen is vaak groot. Dat is bij De Toorn van Thunaer ok zo. Dat is hiel mooi. Mèensen bint ok hiel betrökken. Ik vind het mooi um met betere zangers te warken. In dit geval doet der allemaol meènsen metan die al zangervaring hebt in koren. Wat ok mooi is: ik mag een beetie mien gang gaon van Jan. Ik huuf niet exact te speulen wat der stiet, maor mag variëren. Dat doe ik dan ok”, glimlacht e.

‘De vaort derin’

Tiedens het rippteren valt ok op dat e geregeld improviseert, waordeur de pianopartij van een lied vaak net even aans klinkt. Het underdiel oetmaken van een grotere productie vindt Tjako prachtig. “Ik heb mij, veur de rippetities in januari begunden, eerst inlezen in het script. Ik wol eerst weten waor het stuk over giet. Het rippeteren giet mooi, vind ik. Jan hef de vaort der goed in.”

Bang dat e overstemd wordt deur het orkest tiedens de oetvoeringen is e niet. “Ik speul dan op een elektrische piano, dus word gewoon verstarkt.” Undertussen volgt e de ontwikkelingen rondom de productie nauwgezet. “Ik zie via Whatsapp allemaol dingen langskomen, dan weer een decorstuk dat argens vunden is en dan weer iene die kleding an het breien is; hiel leuk. Zulke muziektheaterproducties op locatie bint echt een hot item tegenwoordig. Daorbij vergeleken bint ienmalige kooroetvoeringen haost een beetie oubollig. Dit is echt spektakel. Mèensen kriegt een totaalplaotie te zien.”

Meer weten over Tjako? Kiek op zien website of op de site van RondoM.

Tekst: Annemiek Meijer
Foto: Ton Trompert

Categorieën Nieuws