Veur de allerleste keer kwamen de speulers en muzikanten van De Toorn van Thunaer zaoteraovend 30 november bij Restaurant & Zalencentrum Wielens in Noord-Slien bij mekaor. Under het genot van een happie, een draankie en een hiele bult vrolijkheid weur de glossy van het prachtige locatietheaterproject oetreikt an iederien.
Roelie Lubbers hef het boekwark – want dat is het wal worden – samensteld en wij bint der barre wies met! De reacties waren dan ok enthousiast, net as over het fantastische fotoboek dat ien van oeze ‘hoesfotografen’ Ton Trompert maakt hef.
Aole mot van marsepein
Um wat wiedere invulling an de aovend te geven hebt Jolanda, Robert, Gerard, Henny, Gienus, Fiona en undergetiekende een pubquiz organiseerd. Nog ien keer kunden wij genieten van Kwiebes Kwikzilver en kwamen de peerdekeutels in een puutie; bonnen en bier en dik geil spek; botter, brei en zoere zult en worst en kees en frisse stoet veurbij. As priezen dizze keer. En niet te vergeten die vieze aole mot, die as Kwiebes de hals oetsneden hef. Die bleek as eerste pries barre lekker te wezen (want in Sunterklaos-oetvoering). Het varkentie van marsepein gung hen de miest loze groep met daorin – jaowal – under anderen Jan Kruimink en Gerrit Hegen. Harm Dijkstra is later via de achterdeur afdreupen, heurde ik.
De quiz leverde de zaal en ok de organisatie een hoop lol op. Veural de fotoronde, waorin niet allent foto’s van bekende filmsterren zaten, maor ok veer sterren van De Toorn van Thunaer. Veural de antwoorden bij de foto’s van Mia, Herman en Gienus waren nogal ies origineel. Mia weur meerdere keren anzien veur Joni Mitchel, Gienus veur David Hasselhoff (mug e willen) en in Hermans jeugdfoto dachten quizzers Jan Kruimink, Hennie Huisman, Paul van Vliet of zölfs zien grote idool Neil Young te herkennen.
Herinneringsbank
As klap op de vuurpijl verraste Anna Kreuk de drei initiatiefnimmers van De Toorn van Thunaer met het anbod een herinneringsbank te plaotsen op De Klencke bij het speulveld. Zie is al een end op weg um dit veur mekaor te kriegen. Een idee dat veul lof oogste en hier en daor haost wat natte oogies.
Het geweldige theaterspektakel op De Klencke zal nog lang en op verschillende manieren naogalmen op De Klencke, in Slien, Hesseln en Zweel. Der bint vriendschappen ontstaon, mèensen gaot gezamenlijke naor optredens van mekaor of doet samen argens an met en vanzölf deelt wij de mooie herinneringen.
The Armed Man
En een groot deel van de ‘Thunaeri’ plakt der samen met Muziekvereniging Excelsior een neie samenwarking an vast. In september volgend jaor doet zie met an de oetvoering van het klassieke stuk The Armed Man in Coevern. Dat betiekent vanof 5 januari vannei rippeteren in de Hesselerhof met nog een hiele bult neie zangers derbij. Veur meer informatie daorover kuj terecht op de website van Excelsior. Op naor neie herinneringen!
Mooi is dat met de Toorn van Thunaer ok roemschoots voldaon is an de doelstellingen van de organiserende Stichting ter Klinke. Genog redenen um samen met de initiatiefnimmers al nao te denken over een een nei project.
Tekst: Annemiek Meijer
Foto’s: Ton Trompert, bekijk het hele fotoalbum
