Quintus Querido zörgt veur muzikale start kaortverkoop

Roem drei maond wordt der non drok rippeteerd deur speulers en zangers, maar veur de eerste boetenrippetitie van De Toorn van Thunaer in Slien zaoterdag mus der eerst wat aans gebeuren: het was tied veur de officiële start van de kaortverkoop. Ok weurden de wandel- en de fietsroute prissenteerd. Daorveur kwam de heer Quintus Querido hoogstpersoonlijk oet de Middelieuwen overweien naor dizze tied.

‘Mien naam ist Quintus Querido, ich bin uw troubadour’, zung de Duuts klinkende man die op piano begeleid weur deur Jan Kruimink. Hie bleek oet Prusen te kommen. En hie bezung, zoas het een troubadour betaamd, geliek ok even wat der loos was in de wereld: van Benneveld tot in Londen.

Middelieuws kostuum

Jeroen Rienties, die veur De Toorn van Thunaer in de hoed van de troubadour kröp, was veur de gelegenheid oetdost in volledig middelieuws kostuum, inclusief schoenen. Een eerste risseltaot van de hardwarkende kledingcommissie. Op het gresveld bij de brandweerkazerne in Slien heurde een flinke menigte zien verhaal an.

Daorna was het tied veur de overhaandiging van de fiets- en wandelroutes, die met hulp van de historische verienegingen van Hesseln, Slienen Zweel speciaal samensteld bint in de sfeer van De Toorn van Thunaer. Centraal in de routes stiet landgoed De Klencke, waor het spektakel zuch in september ofspeult.

Eerste toegangskaort

“Ik kan niet wachten tot september”, zee een opgetogen wetholder Jeroen Huizing toen e even later de allereerste toegangkaort veur het muziektheaterspektakel kreeg oet haanden van zien veurnaomgenoot.

Vanof non kan iederien op dizze website kaorten bestellen. Dit kan ok bij de servicebalie van Warenhuis Drogisterij Koopman in Hesseln, AH Klaver Kortwijk in Slien en bij Coop Weggen in Aalden. Daor bint ok de routeboekies te koop. Die boekies kuj ok kopen bij de historische verienegingen en bij alle TIP-kantoren van Magisch Drenthe.

Brrr….

Veur de boetenrippetie bleek het zaoterdag trouwens niet zo’n beste dag te wezen. Nao even het gevuul kregen te hebben hoe het is om op een groot veld te staon, hebt de speulers het toch maor binnen ofmaakt. Op naor het mooie weer!

Tekst: Annemiek Meijer
Foto’s: Ton Trompert en Bert Haan

Album Ton Trompert: foto’s van de aftrap, maar ook op de speellocatie en bij de kerken van Sleen, Oosterhesselen en Zweeloo

Album van Bert Haan van de aftrap en het repeteren

 

Zie ok het artikel van Gerton Albers in het Dagblad van het Noorden en van Esselien de Groot in de Coevorder Courant.

Categorieën Nieuws