“As der een bui komp, wen der maar vast an, want dat kan vaker gebeuren.” Harm Dijkstra waorschuwde de speulers en zangers van De Toorn van Thunaer veur ze echt hen boeten gungen zaterdag 4 mei. Het was zo wied: de eerste echte rippetitie op het veld achter MFC De Brink in Slien.
Denkbeeldige Boksloot
Net as de eerste poging um boeten te speulen op 13 april hagelde het zaoterdag, maar dizze keer gebeurde dat gelukkig véur de rippetitie. Het verschil met binnen was hiel groot. Ie vuult je opiens een stukkie kleiner aj op een groot gresveld staot te speulen, waor een denkbeeldige Boksloot en een denkbieldige weg vanof Hesseln in meeid bint. Ok de ofstaanden die je as speuler lopen moet vanof de (denkbeeldige) burcht tot an het ‘water’ bint veul groter. Wanneer begun ie dan te lopen en aj loopt, hoe loop ie dan aj veur het eerst het speulveld opkomt? Regisseur Harm en zien ‘assistent’ Jannie Woppenkamp hadden het der drok met.
‘Kerels sneller as dames’
Undertussen keek Hanneke Braam toe um zuch een beeld te vörmen. Hanneke, geboren in Hesseln en woonachtig in Amsterdam, is professioneel regisseur en giet Harm, Jannie en de speulers van adviezen veurzien. Jan Kruimink probeerde tussen de bedrieven deur de koorleden op de goede stee te kriegen, stemgroep veur stemgroep. “Dat giet bij de kerels aaltied wat sneller as bij de dames”, grapte de dirigent, die inmiddels zien pappenheimers kent. Hie oefende oet de lösse pols geliek even een aantal liedties die in het eerste bedrief veurbij komt. Lang leve de stemvörk!
Trekker en wagens
Der weur meer improviseerd zaoterdag: een trekker en een paar wagens mussen decorstukken veurstellen, waor tenielspeulers die niet an de beurt waren achter kunden gaon zitten. Maor dan moej wal weten wanneer oj wal of juust niet an de beurt bint… Klinkt logisch, maor in een stuk met zoveul mèensen en scènes is dat mangs wal even oetproberen. Het kost tied veur alles op zien plek valt. En de tied vleug veurbij op dizze leerzame zaoterdag. Op naor de volgende!
Tekst: Annemiek Meijer
Foto’s: Ton Trompert
