Stukkien van twie speulers

Oes is vroagd een stukkien te schrieven veur in de neisbrieve van Toorn van Thunaer. Tuurlijk doet wij dat eem.

Um bij’t begun te begun’n:

Wij bint tenielspeulers en heurd’n apart van mekoar over de Toorn. Wij gung’n alle twie noar de informatie oamd in Hessel’n en kwamen der tot oeze schrik achter dat ok van de tenielspeulers wordt verwacht dat ze goat zing’n. Wij gaven de moed al hoast op, moar bedacht’n oes da’w misschien ok wal op zangles kunt goan. Zo gezegd zo gedoan, de stoute schoen’n antrök’n, en verduld, wij hebt d’r een neie hobby bej!

Stief van de zeen’n

Dan de auditie…. Stief van de zeen’n hen Slien. ’s Mörgns al opstoan met een dikke zere keel… allemoal spanning vanzölf….

Wij zaat’n met een groepie van 8 of 9 vrouwluu, en natuurlijk Jan en Harm. Eem warmzing’n leek een makkelijke opdracht, moar wij kend’n het liedtien niet iens! Het zal wal een bekend melodiegie weez’n veur koorleed’n, want de aander wichter zung’n direct uut volle böst. Noa twie keer anheur’n zung’n wij ok veurzichtig een beetien met.

Wal schier

Doarnoa ien veur ien “toon overnim’n” Wij waarn al lang bliede dat wij niet as eersten mussen, want non kundn wij mooi eem kiek’n wat de bedoeling d’r van was. Het gung oes beide wal schier of. Wij kreeg’n d’r al wat meer verdusie in en de sfeer was hartstikke goed. As d’r eem wat niet goed gung was d’r gien man overboord. Gewoon een keer opnei probeern, of wat aans goan zing’n, net zo gemakkelijk! Jan op de piano probeerde bij elk en ien oet hoe hoog as e kan zing’n en Harm zat doarover antiekenings te maakn. ’t Zit d’r natuurlijk dik in dat hij wal meer opschreev’m hef, moar doar hebt wij vanzölf niks met te maakn…

Gezellig uurtien

Iederien had ien of twie liedties oetkeuz’n um te goan zing’n. Ik vun het een genot um noar de aandern te luustern. En in’t begun wast griezelig spann’d um zelf te goan stoan bij de piano woar Jan op zat te speul’n, moar dat was zo over, want die keerls wit wal hoe ze je op je gemak kunt stelln. Achterof was’t eingelijk jammer dat wij d’r zo teegnan keekn, want het was een gezellig uurtien.

Wij mugt ok nog komm’n um auditie te doen veur acteern. Doar bin wij sowieso minder benauwd veur want dat is meer oes ding, of veural langer oes ding, moar noa dizze ervoaring kiekt wij d’r hielemoal niet meer teegnan!

Bea en Rieta

Categorieën Nieuws