Roem een half jaor lang is een groep vrouwluu hard an het wark west um alle speulers van De Toorn van Thunaer in de kleren te kriegen. Een waore monsterklus. De vieftien snieders hebt, under anvoering van Wemmie Eggens, Robert Braam en Saskia Dingelstad, prachtige creaties ofleverd.
De enthousiaste kreten waren niet van de locht toen de speulers op de tenielrippetitie van begun juli heur kleding in haanden kregen en antrökken. Van ienvoudige boerlui en rovers tot monniken en de rieke adel; alle rangen en standen waren herkenbaar an heur kleding. Foto’s? Nee, die lao’w nog even zo min meugelijk zien. Der möt wat te raoden overblieven.
Een kamer vol kleding
Kört veurdat alles oetdield wordt, lek de logeerkamer bij Wemmie Eggens thuus wal een opslagplaots. Hij leg vol met kostuums, witte bloesies en mutsies, lappies stof en puuties. Achter de ogenschienlijke chaos zit wal degelijk orde. “Kiek, in dizze map hol wij bij wel der metan döt en welke kledingstukken veur dat personage af bint”, wes Wemmie. “As der weer kledingstukken binnenkomt, dan turft wij zodat wij overzicht hold.”
Alle snieders kriegt opdrachten en stoffen met. “Wij hebt hiel veul stoffen kregen, zoals lakens en gordienen bijveurbeeld, maor wij bint ok wal hen de markt west um stoffen te kopen. En as wij bepaalde kleuren neudig bint die wij niet hebt, dan verft wij soms stoffen.”
Leren van mekaor
Witte lakens bint oetdield um witte rokken van te maken. De dames die zo’n rok anmoet, mussen dat zölf doen (of zölf oetbesteden). De rest van de kleding is allemaol deur de snieders maakt. Geregeld kwam de club op maandagaovend bij Wemmie thuus in Slien um te overleggen. “Wij bint ok een keer een hiele aovend gordienen an het knippen west”, lacht ze. “Wat ik zo mooi vind, is da’j van mekaor leert. De saamheurigheid binnen de groep snieders is zó leuk. Het giet allemaol hiel gemoedelijk.”
Sommige dames hebt zuch veural bezigholden met het neeien van bloesen en mutsies, aanderen hebt kostuums veur de heufdrolspeulers maakt. Wemmie: “Elke heufdrolspeuler hebt wij koppelt an ien snieder, zodat zie underling kunden ofspreken veur het opnimmen van de maten en het passen.”
Non alles oetdield is, is de ‘operatie kleding’ haost op zien einde. Waor nog wat miste, is nog wat extra maakt. Allent de kinder die metan doet, moet nog pakkies kriegen. Dan hebt de snieders vakantie, hoewel sommigen ok helpt bij het umkleden tiedens de veurstelling. Zie bint een ervaring en een hiele hoop kennis rieker. “Deur zoiets leer ie ok weer allemaiol neie mèensen kennen.” Wemmie lacht: “Robert zee lest tegen mij: ‘Een half jaor leden kende ik je nog niet en non loop ik bij je op de slaopkamer’.”
Tekst: Annemiek Meijer
Foto’s: Ton Trompert
