‘Wij doet dit niet as politieagent, maor de ervaring is wal handig’

Gerard Aalderink, Ben Uneken en Willem Woppenkamp oet Slien vörmt de commissie veurzieningen van De Toorn van Thunaer. Zie regelt under meer dat alles rondum de veurstelling veilig kan verlopen en dat alle bezukers het terrein en de parkeerplaots vinden kunt.

In het dagelijks leven bint de drei Sliener politieagent. Het organiseren van evenementen is heur vanoet heur wark dan ok niet vrumd. “Bij de musicals Heb lief en leef en Op de vleugels van de wind in 2008 en 2014 in Slien hew dat ok daon. Wij kiekt deur oes wark misschien net even deur een wat aandere bril naor dit soort evenementen”, zeg Ben. Lachend: “Gerrit Hegen vruug oes veurig jaor of wij weer metdenken wolden over de organisatie. Veur wij het wussen, waren wij de commissie veurzieningen.”

Gien rovers in het water

De drei doet ok gewoon met an met De Toorn van Thunaer. Willem is Hesseler, Gerard speult as Hazarman de Hellige een grote boef en Ben blef het dichtst bij zuchzölf: hie is Sliener. Gerard: “Ik was hielemaol niet van plan um met an te doen, naost het organiseren. Maor tiedens een rippetitie van oes koor Pur Sang in Slien flusterde Harm Dijkstra, die naost mij zat, zo opiens: ‘Ik heb toch een rol veur je. En o ja, ie moet ok peerdrieden’.”

Dat leste gebeurt oeteindelijk niet, al hef Gerard wieder wal een oetdagende rol. Maor terug hen het commissiewark; wat holdt dat in? “Wij kiekt simpel gezegd of alles veilig is. Een veurbeeld: het plan was dat een aantal speulers an het eind van de veurstelling in de Boksloot springen zulden. Toen bleek dat wij dan in verband met de veiligheid een professionele duker in het water moet hebben. Daorum is besleuten dat niet te doen. Het möt niet gebeuren dat der tien man in het water springt en der maor negen weer oet komt.” “Of dat der tien in springt en der komt elf weer oet. Dan hew nog een groter probleem”, reageert Willem. De mannen hebt een hoop lol samen.

51 verkeersborden

Een aander aspect is het regelen van de verkeersstromen. Vanoet verschillende kaanten komt de bezukers vanof dinsdagaovend hen landgoed De Klencke. Waor moet ze langs um de parkeerplaots ienvoudig te bereiken? En hoe zit dat met de fietsers en mindervaliden? “Het mieste komt an op gezond verstaand”, zegt Gerard. “Der bint 51 gele verkeersborden plaotst um iederien op de goede plek te kriegen. Um het parkeren in goede banen te leiden wark wij samen met het team verkeersregelaars Gees. Die hebt veul ervaring en daor huuf wij oes dan wieder niet met te bemuuien.”

De organisatie warkt volgens een deur de gemiente Coevern goedkeurd veiligheidsplan. Daor hebt Willem, Ben en Gerard zuch ok met bemeuid. Daornaost regelt de commissie veurzieningen dat der EHBO anwezig is met under meer een brancard en een AED. Ok is der riekening holden met waor ambulances en braandweer langs moet as der wat gebeurt. Gerard: “Dat wil gienien, maor je moet der wal over naodenken. Der is elke aovond doezend man op het terrein, daor is de EHBO op ofstemd.”

“Wij kiekt ok wal hoe aandere organisaties het doet, zoas Sweelpop bijveurbeeld. Dat is vergeliekbaar met wat der op De Klencke gebeurt”, zeg Willem. Ben: “Ik ben lest hen de veurstelling Mammoet op het Bunerveld west. Dan kiek ik daor ok even hoe zie dat doet met bijveurbeeld het parkeren.”

‘Maar ien keer goed doen’

De mannen hebt ok een verdeling maakt veur as der wat gebeurt waordeur het terrein moet worden ontruumd. De ien nemp dan de tribune veur zien rekening en de aandere beide ontfermt zuch over het speelterrein, de muziektent en het terrein bij het Tolhoes. “Wij doet dit wark niet as agent, maor het is wal handig daj wat ervaring der met hebt”, zeg Ben. Gerard: “Wij weet waor Abraham de mosterd haalt.”

’s Nachts wordt het terrein bewaakt. Der is een bedrief inschakeld dat de boel in de gaten holdt. “As der wat is, is der ok ’s nachts iene van oes bereikbaar”, zeg Gerard. Ok bij de opbouw van het terrein bint de mannen betrökken en Gerard is ok nog reserveplakker van headsetties van speulers die los gaot zitten. Zie hebt der de haanden vol an de leste weken. “Der bint straks vief veurstellingen met bijna 800 man publiek op de tribune en dat kuj maar ien keer goed doen”, zeg Willem. “Wij wilt straks met mekaar terugkieken op een geslaagd evenement.”

Ien grote familie

Ben: “Het met an doen en de saamhorigheid van de verschillende dörpen vind ik prachtig. Ie leert in körte tied veul neie mèensen kennen en het vuult nou al as ien grote familie.” Gerard denkt der net zo over. “Ie komt soms ok mèensen tegen die aj jaoren niet spreuken hebt. Ik zat bij Robert Braam in de klas op de mavo in Hesseln en har hum daornao nooit weer zien. Wij bint al een aovend op stap west. Geweldig vind ik dat.” Willem: “Wat het veur mij mooi mak, is de combinatie van het organiseren en het met an doen. Ik heb gien grote rol, maor dat speulen en zingen vind ik hiel mooi. En dan de locatie, die is uniek!”

Tekst: Annemiek Meijer
Foto’s: Bert Haan

 

Categorieën Nieuws